طريقة عمل كحك العيد بالصور

كحك او كعك العيد ... فرحتى بالعيد بتكون بنقش الكحك انا وأولادى .. زى ما كانت أمى بتنقش معانا .. كل سنه وانتم طيبين وربنا ما يقطع لنا عاده . 

المكونات :
1 كيلو دقيق ( طحين ).
نصف كيلو سمن بلدى .
1 ملعقه صغيره خميره مذوبه فى ربع كوب ماء + 4 ملاعق كبيره سكر.
نصف ملعقة صغيره بيكنج بودر .
1 ملعقه كبيره ريحة كحك . ( من العطار ).
حوالى كوب ماء .
ملعقه كبيره سمسم نئ .( أنا لم أستخدمه .. مش بحبه مع الكحك )
** الأصل فى الكحك ان السمن نصف كمية  الدقيق .

الطريقه الأصليه .. نسخن السمن جداااا ( يقدح ) ثم يوضع على الدقيق + ريحة الكحك + ملعقة كبيره سمسم . ونقلب بملعقه خشب جيدا حتى يبرد الخليط قليلا ثم نفركه بين ايدينا ثم نضيف الخميره ونعجن جيداااا ونضيف الماء قليلا حتى نحصل على عجين متماسك. 
الطريقه هنا فيها السمن عادى ( غير ساخن ) .. نخلط كل المكونات مع بعض بدون السمسم .

 اعجن جيدا ثم أضيف الماء تدريجيا 

حتى نحصل على هذا الشكل .

نغطى العجين ونتركه يرتاح نصف ساعه . ثم نبدأ التشكيل.. 
نأخذ قطعة عجين ( الحجم حسب الذوق .. انا بحبها صغيره ) .

نعجنها جيدااا فى يدنا حتى تكون ملساء ونشكلها كره صغيره .

نفردها ( نبططها ) قليلا .

ثم نبدأ ننقشها ( نرسم عليها ) بالمنقاش . 

دى الرسمه المعتمده عندى من سنيــــــــــــــــــــــــــــن . كلما حفرنا اكثر اثناء الرسم كلما تحملت الكحكه كمية سكر اكثر عند الأكل.

هنا استخدمت القالب .. سهل لكن رسمته بتختفى قليلا بعد التخمير والخبز . وبصراحه مش بيدينى احساس زمااان .. ناس غاويه شقى :)  نعمل الكره الصغيره ثم نضعها فى القالب ونضغط عليها .

ثم نخرجها ... عمليه نضيفه 100%

هنا شكل الرسمتين .

نرصها فى الصينيه او الصاج ونسيب مسافه بسيطه بينهم ( انا وضعت ورق زبده لسهولة التنظيف مش أكتر ..لأنه مش هيلزق )

ده شغل أولادى ... حلو طبعا حد يقدر يقول غير كده :)

هنغطيه تانى ونتركه يختمر .. ثم نشغل الفرن على حراره فوق المتوسطه ونتركه يسخن ...ثم نضع الصينيه فى الرف الأوسط . حوالى 15 دقيقه . ممكن تتركيه فاتح من فوق أو تشغلى الشوايه من نصف دقيقه الى دقيقه بالكتير .
* الأفران تختلف لذلك يجب متابعته بعد حوالى 8 الى 10 دقايق. والأفضل تجربى فى صينيه صغيره حتى تحددى درجة الفرن المناسبه.

نتركه فى الصينيه حتى يبرد تماما ثم نضعه فى علبه بلاستيك بغطاء مُحكم .. و عند التقديم نرش عليه السكر البودر .

وبألف هنا .
** بعد تجربتى للطريقه الثانيه ( بدون تسخين السمن ) قررت ارجع تانى للطريقه الأصليه ..طعمها حلو جدااا بردو لكن الفرق فى الرائحه .. السمن المقدوح على ريحة الكحك بيعمل فرق كبير . 

طريقة عمل البيتى فور

الوصفه منقوله ولكنها بنفس طريقتى .. 

المقادير:

1 كوب زبدة لينة بحرارة الغرفة

2 بياض بيض أو بيضة كاملة

1 م ص فانيليا

½ كوب سكر (اذا بتحبي حلاوتها زيادة اضيفي 2 – 3 م ك)

¾ 1 كوب دقيق (ممكن تحتاجي ¼ كوب زيادة)

فستق حلبي مطحون

مربى مشمش او فراولة

شوكولا دهن مثل نوتيللا

شوكولا سايحة

الطريقة:

حمي الفرن على 180 درجة رقم 4  ضعي الرف في وسط الفرن .. ضعي بخلاط الكيك السكر والزبدة واخفقيهم جيدا حتى يبيض لونهم ويصبح الخليط هش .. استخدمي مضرب السلك .

 

اضيفي البيضة والفانيليا واخفقيهم جيدا حتى يتجانس الخليط (يكون شكله نفس شكل خليط الزبدة والسكر ولكن الين شوي) .

اضيفي الدقيق بالتدريج نص كوب كل مرة واخلطي بالملعقة البلاستيك او الخشب من اسفل الى اعلى لا تخلطي بقوة ولا لمدة طويلة مجرد ان يمتزج الدقيق .. اذا لقيتي الخليط لزج زيادة اضيفي ربع الدقيق الزيادة 

ضعي المزيج في كيس الحلواني او في الة البتي فور المتوفر لديك .. شكليها حسب الرغبة على صينية الخبز (اصابع .. وردات .. دوائر ..) . .

اخبزيها من  10 – 15 دقيقة .. راقبيها دائما حتى لا تحترق .. ما تاخد وقت طويل ابد .. اذا كانت لا تزال من اعلى بيضاء شعلي الفرن من اعلى ..اخرجيها من الفرن واتركيها تبرد تماما .

 ادهني الحبات الطويلة بالمربى والصقيهم ببعض ثم ادهني طرفها بالمربى واغمسيه بالفستق المطحون .ضعي قليل من المربى بوسط الشكل الدائري واتركيها هكذا .. او اغمسيها بالفستق الحلبي .

ادهني الوردات بنوتيللا والصقيها بأخرى وضعي نقطة من الشوكولا السايحة في وسطها من الخارج .. او فقط ضعي شوكولا من الخارج بدون حشوة النوتيللا .. اتركي بعض الحبات سادة بدون تزيين .

**إضافة .. اذا حبيتي بيتفور بالشوكولا ابدلي ربع كوب طحين بربع كوب كاكاو واخلطيه مع الطحين قبل اضافته على خليط الزبدة والبيض .. او ممكن تقسمي الخليط الاساسي الابيض نصفين بحيث يكون نصفه ابيض والثاني اضيفي عليه ملعقتين طعام كاكاو وقلبيه جيدا من اسفل لاعلى حتى يمتزح .

المصدر مدونة كيك وبيك

تطبيقات الصديقات

حلوى السمبوسك ..

 تسلم ايدك يا سوزى

جروب حاتطبخي ايه انهارده

طريقه عمل شوربة الفراخ بالكريمه

من اطعم الشوربات ... سعراتها الحراريه عاليه لكن طعمها تحفــــــــــه .

المكونات :
1/4 ربع كيلو دجاج ( صدور ) مُقطع مكعبات او شرائح.
بصله صغيره مفرومه ناعم جدا ( انا ببشرها )
2 ملعقه كبيره دقيق.
1/2 نصف لتر شوربه ( مرقه ).
1 كوب كريمه لبانى او كريمة الطبخ .  فى حال عدم توافرها استخدمى ملعقه كبيره دقيق مذوبيه تماماً فى كوب لبن .

الطريقه:
نشوح البصل فى ملعقة سمن او زيت حتى تذبل (حوالى نصف دقيقه فقط ) ثم نقلب معها قطع الدجاج (حوالى دقيقه).
 

نضيف الدقيق ونقلب .

حتى نصل لهذا الشكل ( دقيقه ).

نضيف الشوربه والكريمه ونقلب جيدااا ونتركها تغلى دقيقه اخرى .

وأخيرا نقدمها ونزينها بالبقدونس.

وبألف هنا.

طريقة عمل الكنافه السواريه

شكلها تحفه والطعم طبعا معروف .

الطريقه :
نقطع الكنافه صغير جدااا ونقلب معاها سمن .. لكل نصف كيلو كنافه  كوب ونصف سمن.. ممكن كوب سمن فقط. ونحمرها.

بعد ما نخلص كل الكميه نضيف عليها كوب شربات ( قطر - شيره - عسل ) ونقلبها جيداااااا ثم نضعها فى قوالب الثلج ونضغط عليها جيداااااااااااااااااااااااا.

نقلبها على صينيه ونكرر باقى الكميه .

نزينها بكريم شانتيه او صوص شيكولاته .. وتقدم .

وبألف هنا 

طريقة عمل حلوى السمبوسك

سهله جداااااااااا وغير مكلفه ومنتهى الشياكه.

نجهز السمبوسك بتقطيعها نصفين

نلف كل قطعه على شكل رول ونغلق الطرف الأخير بخليط من الدقيق والماء.

نقليها فى زيت ساخن غزير. ونرصها فى طبق التقديم . ثم نوزع عليها لبن مكثف او صوص شيكولاته او سكر + قرفه.
**بديل اللبن المكثف هو 1ملعقه كبيره سكر ناعم +ملعقه ونصف لبن بودر + 2ملعقه ماء ويخلطوا جيدا للحصول على قوام كثيف مثل اللبن المكثف.

بألف هنا

طريقة عمل كوردون بلو الفراخ ..الفراخ الملفوفه

شكلها راقى وطعمها تحفه و غير مكلفه 

المكونات:

-صدور فراخ فيليه مُتبله ببصل وملح وفلفل وبهارات وليمون.

-لنشون فراخ مُدخن . بيعطى طعم تحفه لذلك انصح باستخدامه جداااااا .. وإن كان ينفع بردو من غيره.

-فلفل رومى ألوان مشوى ومُقشر.

-اوراق جرجير أو سبانخ . ( اختيارى )

-جبن.. النوع المُتاح عندك ..موتزريلا , كيرى , مثلثات , رومى , شيدر , قشقوان . طبعا مش هنستخدمهم كلهم انا بس عملتها كذا مره وكل مره بنوع جبنه مختلف او خليط من نوعين.. والطعم بردو حلو جداااااا.

-دقيق و بيض وبقسماط .

-للصوص :

زبده وعصير ليمون وملح وفلفل.

*الطريقه:

بعد ما نتبل الفراخ على الاقل ساعه .. نفردها بهذا الشكل ونعمل بها عدة تشريحات ليسهل لفها فيما بعد .. أحيانا بدهنها زبده او جبن كيرى أو مثلثات . 

نضع عليها كل المكونات بالترتيب المريح بالنسبه لك.

ثم نلفها على شكل رول ونغلقها جيدا بالأعواد الخشبيه.

نقوم بتغطيتها بطبقة الدقيق المضاف له ملح وبهارات ثم البيض المضاف له ملح وفلفل و ملعقة خل ثم البقسماط المُبهر ايضا.. 

فى صينيه نضع ملعقتين زيت ونحمرها على كل الجوانب .. نعطيها لون فقط ثم ندخلها فرن سابق تسخينه على اعلى درجه لمدة 20 دقيقه .

بعد التسويه نتركها ترتاح قليلا ثم ننزع الأعواد الخشب ونقطعها .

* ملاحظه .. الافضل نقلها على شبكه حتى لا تصبح القاعده طريه وتنفصل طبقة البقسماط عنها كما حدث معى . واضح طبعا فى الصوره :(

الألوان رائعه  الفلفل الأصفر والأحمر والجرجير الأخضر .

الصوص.. هو اختيارى يعنى ينفع من غيره بس بجد بجد طعمه معاها تحفه.

نذوب معلقتين زبده ونضيف معهم ملعقه عصير ليمون وممكن بشر ليمون ... ونقلبهم كويس جداااااا . 

على فكره الصوص ممكن يتقدم مع البانيه العادى والبفتيك او مع الفراخ المشويه .

نوزع الصوص على قطع الفراخ ويُقدم.

وبألف هنا.