السبت، 13 يوليو 2013

طريقه عمل مهلبية قمر الدين بطريقة تقديم جديده


طريقة تقديم شيك والطريقه سهله جدااااا.

طريقه عمل قمر الدين بالصور والتفصيل هنا
المكونات
-1/2 نصف لفة قمر الدين. حوالى 100 جم
-سكر حسب الرغبه.
- لتر ماء. 
-4 ملاعق نشا ( كورن فلاور).
نقطع قمر الدين ونضعه فى الماء مع السكرونضعه على النار مع التقليب من حين لآخر حتى تذوب قطع قمر الدين تماما .نذيب النشا فى قليل جدا من الماء الفاتر. ونضيفها على قمر الدين مع التقليب المستمر حتى يتماسك السائل وتصبح مهلبيه كثيفة القوام.. نتركها تبرد قليلا ثم نضعها فى الكأس وهو مائل بهذه الطريقه. ونضعها فى الثلاجه بهذا الشكل.


ثم نقوم بعمل مهلبية لبن عاديه .. لتر لبن + ثلاثة ارباع كوب سكر على النار الى ان يغلى ثم نذيب 4 ملاعق نشا ونضيفهم على اللبن مع التقليب المستمر حتى تصبح مهلبيه كثيفه. ونتركها تبرد قليلا ثم نضعها على مهلبية قمر الدين بشكل مائل ايضا هكذا.


ثم الطبقه الاخيره مهلبية قمر الدين مره اخرى وبعدها ممكن نضع الكأس بشكل عادى .. نزينه بجوز الهند او المكسرات ويُقدم.


وبألف هنا.


الجمعة، 12 يوليو 2013

طريقة عمل الأوز المحشى و البط


بطه أو أوزه الطريقه واحده.. والطعم حكاااااااايه.
الفرق ان طعم الاوز أخف من البط .. ودسم الاوز اقل من البط ..
بس الاثنين تحفــــــــه.

الطريقه:
نغسل الاوزه او البطه جيداااااا .. ننقعها فى ماء وملح وخل ساعه ثم نشطفها جيدا ونزيل اى ريش صغير فيها وننظف جيدا تحت الجناح و عند الرقبه انا بفضل قطع الرقبه من اقرب مكان للجسم حتى لا تأخذ مساحه اثناء السلق او تكون جافه عند التحمير.
يجب تنظيف التجويف الداخلى للطائر جيدااااااا ,, نزيل الرئه ( الفشه ) لأنها تسبب زفره فى طعم الشوربه والطائر .
وهنا شكلها بعد التنظيف . فُله شمعه منوره.


نعمل الحشوه .. اربع بصلات متوسطة الحجم مقطع مكعبات + فلفل رومى مقطع مكعبات + 3 ليمونات مقطعه + ملئ قبضة اليد زبيب + ملح + فلفل + حبهان + بصل بودر + ثوم بودر + بهارات مشكله. نخلط كله مع بعض .


نحشى تجويف الطائر  بالخليط السابق 


وايضا بين الفخذ ( الورك) والجسم.


نغلق الطائر بمعنى اصح نكتفه.. نضم القدمين للداخل حتى نحكم الغلق .


بهذا الشكل


البعض بيخيط الجزء المفتوح .. بس بيبقى صعب اوى فأنا بستسهل وبدخل سيخ معدن من الفخد واشبك فيه الجلد واخرجه من الفخد التانى بالشكل ده .


ونضم الجناحان بخيط قوى .. انا بستخدم خيط الأسنان ..قوى جدا .. 


فى اوسع حله ( قدر ) نضع ماء ولما يغلى كويس نضع الطائر. ونتركه يغلى جيدااااا ..نزيل اى ريم يظهر على سطح الماء.


عندما تصبح الشوربه نقيه بدون اى شوائب نضع بصله + حبهان + ورق لورى + جزره. ونغطى الاناء ونهدى النار حتى تمام السوا .. حوالى ساعه ونصف ..او عندما تدخل السكينه بسهوله فى أسمك جزء .. وايضا نجد اللحم انكمش عن عظم الفخد ( عظمة القدم تظهر )


بعد ما تستوى نخرجها من الشوربه وندهنها صلصة طماطم + ملح وفلفل وندخلها الشوايه تتحمر ونقلبها على كل الجوانب.. فى طريقه اخرى وهى تحميرها فى طاسه بالسمن بس بتكون تقيله جدااا وبتطرطش جامد اوى .


وهنا شكلها بعد التحمير .. لونها رائع. بعد هذه المرحله انصح بتغطيتها بالفويل حتى ميعاد التقديم ليحافظ على السخونه وايضا لإعادة توزيع العصاره داخل اللحم فيصبح أطرى.


نزينها بأوراق البقدونس وتُقدم.


** الصور هنا لأوزه  وليست بطه لكن الطريقه واحده للاثنين .
** طعم الحشوه كان أكتر من راائع ... انا قدمتها مع ارز بالخلطه وكنت بضع من بصل الحشو عليه اثناء الاكل بجد بجد تحفـــــــه وعلى رأى دارين الخطيب " عن جد حبيــــــــــــــــــــــــت " هههههههه .

وبألف هنا.

طريقة عمل الخشاف


من أساسيات البيوت المصريه فى رمضان.

*المكونات:
بلح - تين مجفف - قراصيه - مشمش مجفف - زبيب - جوز هند - قمر الدين .

**مكونات اختياريه:
موز - لوز - سكر.

الطريقه :
تنقع جميع المكونات مع بعضها لمدة ثلاث ساعات على الأقل .
كلما طالت مده النقع كلما كان أطرى.



 يوضع فى كاسات التقديم .. نبرده فى الصيف طبعا .. وفى الشتاء يترك بدرجة حراره الغرفه.


وبألف هنا.