أحلى محشى كرنب بيبقى صغير ومن غير عروق قاسيه تتمضغ تحت سنانك..
وعلشان نعمل كده لازم نتعلم ازاى نقطع الكرنب صح..
.
نبدأ مع بعض ... اول حاجه نفكك ورق الكرنبه عن بعضها وبعدين نسلقها ورقه ورقه فى ماء بيغلى بدون اضافة اى شئ للماء.
بعتذر انى مصورتش الخطوتين اللى فاتوا لكن تتعوض مره تانيه ان شاء الله.
بعد السلق هنحتاج نقطع هذا العرق الصلب اللى فى منتصف الورقه
هنا الورقه الصغيره هنفصل الورقه لجزئين
ثم نقسم النصفين لنصفين بالعرض هكذا
وهنا طريقة لفها عند الحشو
وهنا الورقه الكبيره.. ننزع العرق من منتصف الورقه
ثم نقطعها لنصفين بالطول .. ثم كل نصف يُقطع لأجزاء اصغر حسب الحجم المطلوب
نجمع الأوراق على بعضها استعدادا للحشو .. او نضعها فى اكياس ونحفظها فى الفريزر لحين الآستخدام.
ملاحظات:
*فى ناس بتقطع وهى ماسكه ورقه الكرنب فى اديها ..ممكن بس على الكاونتر بتكون اسهل كتيـــــــــــــر وبتقدرى تتحكمى فى الحجم اللى انتى عايزاه بالظبط .
* لو هتحشيها فى نفس اليوم زودى وقت السلق شويه علشان تبقى طريه وتتخلصى من المواد التى تسبب الانتفاخ .
اما لو هتحفظيها فى الفريزر فيجب سلقها نصف سلقه يعنى تدخل المايه نصف دقيقه وتخرجيها على طول وتبرديها بسرعه ... لأن التجميد بيزود من سواها وممكن الورقه تتقطع منك بعد اذابتها .
* الحشو يكون بعرض اتجاه العروق علشان لو العكس الورقه مش هتتلف كويس والحشو هيخرج منها .. انظرى لصور الحشو جيدا.
وبألف هنا وشفا.
ليست هناك تعليقات:
إرسال تعليق